நீங்கள் தேடியது "மது பாட்டில்கள் பறிமுதல்"

சுவாமிமலை:

சுவாமிமலை பகுதி சரவண பொய்கை தெருவை சேர்ந்தவர் வினோத்(வயது27). இவர் சுவாமிமலை சுற்று வட்டாரப் பகுதிகளில் கள்ளத்தனமாக மது விற்பனை செய்து வருவதாக இன்ஸபெக்டர் ராமமூர்த்திக்கு ரகசிய தகவல் வந்துள்ளது.

இதையடுத்து இன்ஸ்பெக்டர் ராமமூர்த்தி உத்தரவின் பேரில் சப்-இன்ஸ்பெக்டர் காசியய்யா, ஏட்டு மாரியப்பன் மற்றும் போலீசார் இன்று காலை 8 மணியளவில் சரவண பொய்கை தெருவிற்கு சென்று வினோத் வீட்டருகில் மறைந்திருந்து கண்காணித்தனர்.

அப்போது வினோத் மதுபாட்டில்களை விற்பனைக்கு எடுத்துக் கொண்டு வீட்டில் இருந்து வெளியில் வரும்போது அவரை பிடித்து விசாரித்தனர். மேலும் அவரது வீட்டில் பின்புறம் நடத்திய சோதனையில் ஒரு பெட்டிக்கு 48 பாட்டில்கள் கொண்ட 50 அட்டைபெட்டிகளை போலீசார் கைப்பற்றினர். அதில் 2400 மதுபாட்டில்கள் இருப்பது தெரியவந்தது. அதன் மதிப்பு ரூ. 1 லட்சத்து 50 ஆயிரமாகும் என்று போலீசார் தெரிவித்தனர்.

கடந்த சில நாட்களாக பள்ளி, கல்லூரிகளுக்கு தொடர் விடுமுறையை ஒட்டி சுவாமிமலைக்கு ஏராளமான சுற்றுலா பயணிகள் வந்து செல்கின்றனர். இதனால் வினோத் அதிகளவில் மதுபாட்டில்களை வாங்கி வீட்டில் பதுக்கி வைத்து கள்ளத்தனமாக கூடுதல் விலைக்கு விற்றது விசாரணையில் தெரியவந்தது. இதையடுத்து போலீசார் மதுபாட்டிகளை பறிமுதல் செய்து, வழக்குப்பதிந்து வினோத்தை கைது செய்து விசாரணை நடத்தி வருகின்றனர்.

வத்தலக்குண்டு:

தமிழகத்தில் டாஸ்மாக் கடைகளை மதியம் 12 மணிக்குதான் திறக்க வேண்டும். ஆனால் வத்தலக்குண்டு பகுதியில் டாஸ்மாக் கடை பார்களில் பணியாற்றும் ஊழியர்கள் மது பாட்டில்களை மொத்தமாக கொள்முதல் செய்து குடிமகன்களுக்கு 24 மணி நேரமும் தங்கு தடையின்றி சேவைகளை வழங்கி வருகின்றனர்.

கூடுதல் விலைக்கு விற்ற போதும் மதுவுக்கு அடிமையான தொழிலாளர்கள் காலை முதலே டாஸ்மாக் கடைகளில் விழுந்து கிடக்கின்றனர். மேலும் குடிபோதையில் பஸ்நிலையம் மற்றும் நகர் பகுதியில் ஆங்காங்கே அரை நிர்வாண கோலத்தில் படுத்து விடுவதால் பொதுமக்கள் கடுமையாக பாதிக்கப்படுகின்றனர்.

எனவே சட்ட விரோதமாக மது விற்பவர்கள் மீது கடும் நடவடிக்கை எடுக்க வேண்டும் என பொதுமக்கள் வலியுறுத்தினர்.

திண்டுக்கல் மாவட்ட போலீஸ் சூப்பிரண்டு தனிப்படை போலீசார் வத்தலக்குண்டு நகர் பகுதியில் அதிரடி சோதனை நடத்தினர். இதில் டாஸ்மாக் கடை பார்களில் பதுக்கி வைக்கப்பட்டு இருந்த 180 மது பாட்டில்களை பறிமுதல் செய்தனர்.

மேலும் மது பதுக்கிய சகோதரர்கள் உள்பட 4 பேரை போலீஸ் நிலையத்துக்கு அழைத்து வந்து தீவிர விசாரணை நடத்தி வருகின்றனர். அனுமதியின்றி மது விற்றால் கடும் நடவடிக்கை எடுக்கப்படும் என போலீசார் எச்சரித்துள்ளனர்.

ராஜபாளையம்:

விருதுநகர் மாவட்டத்தில் தடை செய்யப்பட்ட புகையிலை பொருட்கள், திருட்டு மது விற்பனை நடைபெறுவதாக மாவட்ட போலீஸ் சூப்பிரண்டு ராஜ ராஜனுக்கு தகவல் கிடைத்தது.

அவரது உத்தரவின் பேரில் ராஜபாளையம் சரகத்தில் துணை சூப்பிரண்டு ரவிச்சந்திரன் மேற்பார்வையில் போலீசார் அதிரடி சோதனை நடத்தினர்.

தெற்கு போலீஸ் இன்ஸ் பெக்டர் பவுல்ஏசுதாஸ், சப்-இன்ஸ்பெக்டர்கள் அருண்குமார், மூவேந்திரன், திருமலைராஜா மற்றும் போலீசார் ரோந்து சென்றபோது சங்கரன் கோவில் முக்கு பகுதியில் உள்ள கடையில் தடை செய்யப்பட்ட புகையிலை பொருட்கள் விற்கப்படுவது தெரியவந்தது. அதனை பறிமுதல் செய்ததோடு, கடை உரிமையாளர் முருகனையும் கைது செய்தனர்.

இதேபோல் அக்னி, சரவணன் (48) ஆகியோரும் புகையிலை பொருட்கள் விற்றதாக கைது செய்யப்பட்டனர்.

சேத்தூர் புறக்காவல் போலீஸ் சப்-இன்ஸ்பெக்டர் ராமசாமி தலைமையிலான போலீசார் ரோந்து சென்றபோது சுந்தர் ராஜபுரம் பகுதியில் ஒரு கடையில் திருட்டுத்தனமாக மது விற்கப்படுவது தெரிய வந்தது. அதனை விற்றதாக போதராஜ் (40) என்பவரை கைது செய்த போலீசார் 20 மதுபாட்டில்களையும் பறிமுதல் செய்தனர்.

தளவாய்புரம் போலீஸ் சப்-இன்ஸ்பெக்டர்கள் பெருமள்சாமி, ரெங்கன் மற்றும் போலீசார் முறம்பு பகுதியில் மது விற்றதாக நாகராஜ் (27) என்பவரையும் சேத்தூர் சப்-இன்ஸ்பெக்டர் வெங்கடேஷ், சொக்கநாதன் புத்தூர் பகுதியில் மாரிமுத்து (29) என்பவரையும் கைது செய்தனர். அவர்களிடம் இருந்து மது பாட்டில்கள் பறிமுதல் செய்யப்பட்டன.